إللي ضحكتهم بهتت .. وإللي عينيهم دبلت .. المبهدلين، والمحتاسين دايمًا، إللي مش عارفين رايحين فين، وإللي بتغاشموا أما ياخدوا قرار وبيتدبوا علي بوزهم، واللي بيلسبوا لبسهم العادي جدًا ف الـ events إللي الناس بتتشقلب فيها، اللي بيلموا شعرهم كحكة فـ وسط الأفراح ، واللي بيلبسوا شراب قصير ع الجزم الكلاسيك.. اللي بيغنوا بصوت عالي وهمّ لوحدهم فالعربية، واللي بيغنوا وهمّ صوتهم وحش، وإللي عمرهم ماكلوا سوشي، واللي بيمشوا بسرعة، واللي بيملوا بسرعة والرتابة مضرة على صحتهم .. إللي بيضحكوا بصوت عالي فـ نص الشارع، وإللي عندهم ليستة للبلاد إللي عايزين يروحوها ولسّه معلّموش علي أي واحدة فيهم.. بتوع بؤس الساعة 8 بالليل وراحة البال بتاعة نص الليل لمّا كل حاجة بتنام .. واللي بيمسكوا فـ غنوه واحدة طول السنة، إللي بيبقوا لسة بيذاكروا يوم الإمتحان الصبح والناس بتراجع لـ3 مرة مثلًا وميتهزوش.. وإللي بيحبوا سحلة الإمتحانات وأي سحلة بتاخدهم من عيشتهم.. إللي بيقعدوا يستحموا ساعتين وميبقاش حد فالبيت طايقهم، وإللي بيحبوا الأيس كريم فـ الشتا، وبيشربوا كاكاو فـ الصيف.. واللي بيضربوا نص بطيخة لوحدهم، اللي بيسلموا بعدين يفتكروا ده مين .. إللي حياتهم ماشية عشان لازم تمشي، التايهين، اللي فاكرين إنهم تاهوا لوحدهم .. إللي بيفضلوا الوحده ع اللمه الباهته .. وإللي بيحسوا بوحدتهم وسط الناس .. ركزوا .. إنتوا هتخلوا العالم مكان أفضل يستحمل إننا نعيش فيه .. شكراً